Son təyinatlar ölkə rəhbərliyinin yerli icra orqanlarında idarəetmə keyfiyyətini yüksəltməyi, bölgələrdə dövlət siyasətinin səmərəli icrasını və korrupsiyaya qarşı mübarizənin qətiyyətli mərhələyə keçdiyinin daha bir təsdiqi idi. Yerdəyişmələrdə və təyinatlarda əsas məqsədin nə olduğu əslində Cənab Prezidentin təyin etdiyi şəxsləri qəbul edərkən söylədiyi fikirlərdə əksini tapıb.
Cənab Prezident məmurlardan gözləntisinin nələrdən ibarət olduğunu açıq şəkildə ifadə etdi və göstərişlərini verdi. Əsas məqsəd odur ki, məmurlar öz vəzifələrini ləyaqətlə, ədalətlə icra etsinlər. Prezident çıxışında məmur davranışının əhəmiyyətinə xüsusi toxundu. O, dövlət qulluqçularının təkəbbür və lovğalıqdan uzaq, təvazökar olmasını tələb etdi: “Məmur özünü xalqdan üstün tutmamalıdır”.
Dövlət başçısı eyni zamanda bir daha xatırlatdı ki, korrupsiya və rüşvətxorluğa qarşı mübarizə qətiyyətlə davam etdiriləcək və “heç bir qanunsuz hərəkət nəticəsiz qalmayacaq”.
Bu mesaj İlham Əliyevin rəhbərliyi ilə son illərdə aparılan kadr islahatlarının davamı kimi səsləndi. Artıq bir çox yüksək vəzifəli şəxslərin məhkəmə qarşısında cavab verməsi, dövlət sistemində “özünütəmizləmə” prosesinin reallığını sübut edir.
Prezidentin çıxışında sosial ədalət anlayışı xüsusi yer tutdu. O bildirdi ki, “hər bir bölgədə insanlar görməlidirlər ki, ədalət hər zaman üstünlük təşkil edir”. “etimadı doğrultmaq, xalqa xidmət etmək, xalqın rəğbətini qazanmaq” hər bir rəhbərin borcudur.
Bu, təkcə tapşırıq deyil — bu, Prezident İlham Əliyevin müəyyən etdiyi müasir Azərbaycan idarəçilik fəlsəfəsidir. Bütövlükdə, son təyinatlarla ölkə rəhbərliyi yerli icra orqanlarında idarəetmə keyfiyyətini yüksəltməyi, bölgələrdə dövlət siyasətinin səmərəli icrasını və korrupsiyaya qarşı mübarizənin yeni mərhələyə keçməsini hədəfləyir.